Ӧткӧн неделеде, кӱӱк айдыҥ 22-чи кӱнинде, јаҥныҥ партиязыныҥ Государственный Думага кандидаттар талдаар праймеризиниҥ окылу турулталары Горно-Алтайскта да, Москвада да окылу јӧптӧлди. Ондо темдектелгениле, Алтай Республикада «Единая Россияныҥ» праймеризинде ӱч баштапкы јерди алтайлар (Иван Белеков, Родион Букачаков, Айдар Мызин) алгандар. Эмди олор ӱчӱниҥ ортозынаҥ эки кандидат талдалып, Госдумага бирӱзи партиялык списокло, экинчизи бир мандатту округла баргылаары кичӱ изӱ айдыҥ экинчи јарымында партияныҥ съездинде окылу јӧптӧлӧр.

«Јӱрӱмниҥ јолыныҥ» редакторы Семен Танытпасовтыҥ шӱӱлтезиле, јаҥныҥ партиязыныҥ политический ле генеральный советтери Алтай Республикада ӧткӧн праймеризтиҥ чындык турултазын билер болсо, бир мандатту округла Р. Букачаковты, партиялык списокло А. Мызинди кӧстӧгӧдий. Нениҥ учун дезе праймеризтиҥ чындык турулталарын алса, И. Белеков баштапкы јерди административный ресурс ла взбростыҥ болужыла алган. Ол учун анчада ла Кош-Агаш, Улаган, Шабалин, Оҥдой ло Кан-Оозы аймактардыҥ администрациялары тыҥ иштегендер. Взброс јанынаҥ алар болсо, Чой аймактыҥ, Чой, Каракокшо, Паспаул, Сейка јурттарында 6517 ӱнбереечи болордо, олордыҥ праймеризте туружар тапту ӱнбереечилериниҥ тоозы 978 ӱнбереечи (15 процент) болор учурлу болгон. Је И. Белеков Татьяна Гигель ле Михаил Тереховтыҥ болужыла эҥиргери Чой јаар ӱзеери 25 процент ӱнбереечилерге бюллетеньдер «ийип», бойына Чой аймактаҥ 1185 ӱн «јурап алган».
Госдумага ӧткӧн калганчы ӱч талдашты алзабыс, 2003 јылда ӧткӧн ээчий талдашта бир мандату округла единоросс Сергей Пекпеев 40,1 процентле ӧткӧн эди. 2007 јылдыҥ ээчий талдаштарында партийный списокло «Единая Россия» 69,46 процентле, 2011 јылдыҥ ээчий талдаштарында база ла партийный списокло «Единая Россия» 53,33 процентле јеҥген эди…
Родион Букачаковто Сергей Пекпеевке тӱҥдегедий кӧп темдектер бар эмтир: экӱлези – майман, экӱлези – футболисттер, экӱлези талдаштарда арбынду ӱндерди јӱк ле алтайлардаҥ эмес, а орус та, казах та ӱнбереечилердеҥ алгандар…