Тургуза ӧйдӧ јаҥныҥ партиязы «Единая Россия» кӱӱк айда ӧткӱрген праймеризиниҥ турулталарын Москвада быжулай шиҥдеп, ширтеп, бир мандатту кажы ла талдаачы округка кемди тургузары ла текшифедерал списокко кемдерди кийдирери аайынча иш ӧткӱрет. Бу иштиҥ турултазы партияныҥ кичӱ изӱ айдыҥ учында ӧткӱрилетен съездинде јарлалар ла јарадылар.

«Јӱрӱмниҥ Јолы» газеттиҥ редакторыныҥ санаа-шӱӱлтезиле, Алтай Республика кирип турган бир мандатту округка ла текшифедерал списоктыҥ Кемеров облазы, Алтай край ла Алтай Республика кирер округына Алтай Республиканаҥ кемдерди кӧстӧӧри бӱгӱн Москванаҥ да эмес, а Александр Бердников ло Иван Белеков деп эки кижинеҥ камаанду. Бу эки кижи бастыра немениҥ бажына jӱк бойлорыныҥ jилбӱлерин тургузатандарыныҥ ӱстине тӧгӱнчи болгондоры учун, Москвада не болуп турганын бодоштыра да белгелеер арга јок. Темдектезе, Белеков «праймеризти мен jеҥип алгам, бир мандатту окрургка мени кӧстӧгӧр» деп тӧгӱнденердеҥ айабас, а Бердников дезе, «алтайлар – биригип болбос албаты, оныҥ учун Москванаҥ кижи кӧстӧӧр керек» деп, бойыныҥ ойынын ойноор аргалу. Бу оныҥ јаан талдаштардаҥ јаан акчалар иштеп алар калганчы аргазы болгонын айтпаска болбос. Темдектезе, Башкарунаҥ чыгып турган «дийттерле» болсо, ол Москвадагы элчиликтиҥ башчызыныҥ јамызын Марина Деминага јаан акчага садып ийеле, эмди ол кижини элчиликтиҥ бажына тургуссын деп мени Вячеслав Володин сураган деп айдат. База удабастаҥ ол Владимир Полетаевти Федерация Совединеҥ jайладып, оныҥ ордына Марина Деминаны отургызар ла анайып ол сенатордыҥ бир ле jерин эки катап садып ийерге турган деп айдыжадылар?
«Единая Россия», чындаптаҥ ла, Алтай Республикадаҥ депутатту болорго турган болсо, олорго бир мандатту округка Родион Букачаковты кӧстӧӧр керек. Баштапкызында, праймеризти чын jеҥип алган кижи ол (Иван Белеков бойына 2 муҥнаҥ ажыра ӱндерди «jурап алган»). Экинчизинде, «Единая Россиядаҥ» Р. Букачаков барза, ӧскӧ партиялардаҥ алтайлар талдаштарга чыкпас деген ижемји бар. Москва И.Белековтыҥ тӧгӱнине бӱдӱп, оны кӧстӧзӧ, ого удура jӱк алтайлардаҥ ӱч-тӧрт кандидат чыгып келердеҥ айабас. Ол тушта jок jердеҥ jеҥӱни Виктор Ромашкин эмезе Мария Демина алгылап айабас. Москванаҥ јаан акчалу кандидат келип, садынчак алтайларды бойына jаба тартып ийер болор деген чочыду, серемjи база бар. Ӱчинчизинде, Иван Итулович Белековты албатыныҥ адынаҥ бир мандатту округла Родион Букачаковты jӧмӧп, текшифедерал списокло бойы барзын деп сурайдыс.